ജോർജ് ഒവാഷ്വിലിയുടെ 'ചോളദ്വീപ്'

 

ജോർജിയൻ ചലച്ചിത്രകാരനായ ജോർജ് ഒവാഷ്വിലിയുടെ

'ചോളദ്വീപ്' ( George Ovashvili’s 'Corn Island') 

പ്രകൃതിയുടെ അതീവസുന്ദരമായ ഛായാഗ്രാഹിദൃശ്യങ്ങൾ 

നിറഞ്ഞ ഒരു ചലച്ചിത്രമാണ്. നദിക്കു നടുവിൽ രൂപം കൊള്ളുന്ന

ഒരു ചെറിയ തുരുത്തിനെയാണ് ഈ ചലച്ചിത്രത്തിന്റെ 

ഛായാഗ്രാഹി എപ്പോഴും കാണുന്നത്. 

നദിയരികിലെ വനത്തിന്നപ്പുറത്ത് ഉയർന്നു നിൽക്കുന്ന മലകൾ.

ആ തുരുത്ത് വേനലിൽ രൂപം കൊണ്ടതാകണം.

അവിടേക്ക്‌ വഞ്ചി തുഴഞ്ഞെത്തിച്ചേരുന്ന ഒരു വൃദ്ധൻ, 

അയാളുടെ പേരമകളും. 

ആ ദ്വീപിൽ അവർ ഒരു കുടിൽ കെട്ടുന്നു,

അവർക്കു താമസിക്കാനായി.

ഒരു വിളവെടുപ്പിനായി കുടിലിനു ചുറ്റുമായി 

മക്കച്ചോളം കൃഷി ചെയ്യുന്നു.

നദിയിൽ നിന്നും മീൻ പിടിക്കുന്നു.

ആ വൃദ്ധന്റെ മുഖത്ത് വലിയ അനുഭവങ്ങളുടെ തഴമ്പ് 

നമുക്കു കാണാം, ഏതു വെല്ലുവിളിയേയും നേരിടാനുള്ള 

കരുത്തും ആത്മവിശ്വാസവും ആ മുഖത്തു നിന്നും വായിക്കാം.

പ്രകൃതിയുമായുള്ള മനുഷ്യബന്ധത്തിന്റെ സങ്കീർണ്ണതകൾ

ജോർജ് ഒവാഷ്വിലി ആവിഷ്ക്കരിക്കുന്നു.

മനുഷ്യാദ്ധ്വാനത്തിന്റെ മഹത്വം അനുഭവിപ്പിക്കുന്ന 

നിരവധി ദൃശ്യങ്ങൾ ചലച്ചിത്രം ഒരുക്കിയിരിക്കുന്നു.

പ്രകൃതിയുടെ കാലപ്പകർച്ചകൾക്കുമുന്നിൽ 

നിസ്സഹായനാകുന്ന മനുഷ്യനെയും.

മനുഷ്യനെ പിന്തുടർന്നെത്തുന്ന തോക്കും അധികാരവും ഇവിടെയും 

ആ വൃദ്ധനും പേരക്കുട്ടിക്കും പിന്നാലെ തുരുത്തിലെത്തുന്നുണ്ട്.

ആ പെൺകുട്ടിയിൽ പ്രണയം വിതയ്ക്കാൻ മുറിവേറ്റ 

ഒരു യുവപട്ടാളക്കാരനും അങ്ങോട്ടേക്ക് എത്തുന്നു.

പെട്ടെന്ന്, ആ ചെറിയ തുരുത്ത് മനുഷ്യജീവിതനാടകത്തിന്റെ 

വലിയ ഒരു വേദിയായി മാറുന്നു.

വളരെ ഒതുക്കത്തോടെ ഹൃദയാവർജ്ജകമായി സാക്ഷാത്കരിച്ച   

ഈ ചലച്ചിത്രം 2014ലെ IFFK യിൽ ആദ്യന്തം

വലിയ വിസ്മയത്തോടെയാണ് കണ്ടത്‌.