കാത്തിരിക്കുന്ന അമ്മ

 

ആന്ദ്രേ തർക്കോവ്സ്കി സാക്ഷാത്കരിച്ച ചില ദൃശ്യങ്ങളെ പോലെ 

എന്നിൽ ആവേശിച്ച ചലച്ചിത്രദൃശ്യങ്ങൾ വേറെയില്ല. 

അതീവ അത്ഭുതം നിറഞ്ഞ കണ്ണുകളോടെയാണ് 

ആ മഹാചലച്ചിത്രകാരൻ ഒരുക്കിയ ചില ദൃശ്യങ്ങൾ ഞാൻ കണ്ടത്.

കാഴ്ചക്കു  ശേഷവും അവ മനസ്സിൽ നിന്നും മാഞ്ഞുപോകാതെ നിൽക്കും. 

'മിറർ', 'നൊസ്റ്റാൾജിയ' എന്നീ ചലച്ചിത്രങ്ങളിലെ ചില ദൃശ്യങ്ങൾ ഒരു 

കാരണവുമില്ലാതെ പിന്നെയും പിന്നെയും മനസ്സിലേക്കു കടന്നുവരും. 

'മിറർ' എന്ന ചലച്ചിത്രത്തിലെ ദൃശ്യങ്ങൾ തുടർച്ചയോടെ 

സുദൃഢമായി മനസ്സിലാക്കാനോ വ്യാഖ്യാനിക്കാനോ 

എനിക്ക് കഴിഞ്ഞിട്ടുണ്ടെന്ന് തോന്നുന്നില്ല.

എങ്കിലും ചില ദൃശ്യങ്ങൾ അവയിൽ തന്നെ പൂർണ്ണമായി 

എനിക്ക് അനുഭവപ്പെടുന്നു 

ചലച്ചിത്രദൃശ്യാനുഭവം എന്താണെന്നു സമൂർത്തതയിൽ

 ബോധ്യപ്പെടുത്തുന്നവയായി എനിക്ക് അവ മാറിത്തീർന്നിരുന്നു.

തന്റെ അമ്മ അച്ഛനെയും കാത്തിരിക്കുന്ന ദൃശ്യങ്ങൾ 

അതേപടി ആവിഷ്കരിച്ചതാണ്,

'മിറർ' എന്ന ചലച്ചിത്രത്തിലെ കാത്തിരുപ്പുദൃശ്യമെന്നു 

തർക്കോവ്സ്കി പറയുന്നുണ്ട്.  

ആ ദൃശ്യം പല പ്രാവശ്യം തന്റെ ജീവിതത്തിൽ 

നേരിട്ടു കണ്ടിട്ടുണ്ടായിരുന്നുവെന്നു അദ്ദേഹം പറയുന്നു. 

തന്റെ ചലച്ചിത്രത്തിൽ അതു പുന:സൃഷ്ടിക്കുകയായിരുന്നു.

ആ ദൃശ്യം കാണുന്ന എനിക്കും നേരത്തെ തന്നെ എവിടെയോ

അത്  അനുഭവിച്ചതായി തോന്നിയിരുന്നു .

എല്ലാ കാത്തിരുപ്പുകളിലും പൊതുവായുള്ള ഘടകം 

ഇങ്ങനെ വിചാരിക്കാൻ നമ്മെ പ്രേരിപ്പിക്കുന്നതുമായിരിക്കാം.

നോക്കൂ, ആ ദൃശ്യം ഇവിടെ എവിടെയോ 

കേരളത്തിലെ ഏതോ ഭൂഭാഗങ്ങളിലെവിടെയോ 

നിന്നു പകർത്തിയതു പോലെ അനുഭവപ്പെടുന്നില്ലേ?