Saturday, August 27, 2011

മൃതശരീരം: ഹാരോള്‍ഡ്‌ പിന്റര്‍.

 എവിടെ നിന്നാണ്‌ മൃതശരീരം കണ്ടെടുത്തത്‌?
ആരാണ്‌ മൃതശരീരം കണ്ടെടുത്തത്‌?
കണ്ടെടുക്കുമ്പോള്‍ മൃതശരീരം മൃതമായിരുന്നുവോ?
എങ്ങനെയാണ്‌ മൃതശരീരം കണ്ടെടുത്തത്‌?
മൃതശരീരം ആരായിരുന്നു?
 മരിക്കുകയും ഉപേക്ഷിക്കപ്പെടുകയും ചെയ്ത ശരീരത്തിന്റെ
അച്ഛന്‍ അല്ലെങ്കില്‍ മകള്‍ അല്ലെങ്കില്‍ സഹോദരന്‍
അല്ലെങ്കില്‍ അമ്മാവന്‍ അല്ലെങ്കില്‍ സഹോദരി
 അല്ലെങ്കില്‍ അമ്മ അല്ലെങ്കില്‍ മകന്‍ ആരാണ്‌?
ഉപേക്ഷിക്കപ്പെടുമ്പോള്‍ ശരീരം മൃതമായിരുന്നുവോ?
ശരീരം ഉപേക്ഷിക്കപ്പെട്ടതാണോ?
ആരാണ്‌ അതിനെ ഉപേക്ഷിച്ചത്‌?
മൃതശരീരം നഗ്നമായിരുന്നുവോ ,
അതോ,ഒരു യാത്രക്കായ്‌ ഉടുത്തൊരുങ്ങിയിരുന്നുവോ?
മൃതശരീരം മൃതമാണെന്നു പ്രഖ്യാപിക്കാന്‍
നിങ്ങളെ പ്രേരിപ്പിച്ചത്‌ എന്താണ്‌?
മൃതശരീരം മൃതമാണെന്ന് നിങ്ങള്‍ പ്രഖ്യാപിച്ചുവോ?
മൃതശരീരത്തെ നിങ്ങള്‍ക്ക്‌ എത്രമാത്രം നന്നായി അറിയാം?
ആരാണ്‌ മരിച്ചത്‌?
മൃതശരീരത്തെ നിങ്ങള്‍ കുളിപ്പിച്ചുവോ?
അതിന്റെ രണ്ടു കണ്ണുകളും നിങ്ങള്‍ അമര്‍ത്തിയടച്ചുവോ?
ശരീരം നിങ്ങള്‍ സംസ്ക്കരിച്ചുവോ?
അതിനെ ഉപേക്ഷിച്ച്‌ നിങ്ങള്‍ വിട്ടുപോയോ?
മൃതശരീരത്തെ നിങ്ങള്‍ ചുംബിച്ചുവോ?